Danksy my ouers is ek 'n Suid-Afrikaner.
Ek kon gekies het om 'n getroue landsburger te wees wat op weeksdae aan pap en vleis smul.
Ek kon daarvan gehou het om feeste by te woon waar mense skaapkoppe eet en aan goed soos die grootste pampoene in die omgewing erkenning gee. By die springbokdrol-spoegkompetisie sou my naam áltyd bo-aan die lys wees.
Dit sou my trots maak om CD's soos Dertig Goue Sokkie Treffers en wilde musiekgroepe soos Die Teelepels te sien.
Maar dit doen nie. . .
Moet my tog net nie met jou ouma se vetkoeke bestook nie, maar ek is nie 'n patriot in dié sin nie. Ek kan saamleef met die Suid-Afrikaanse kultuur en wegbly van Karoo-feeste, KFC eet vir middagete of selfs net páp eet en die vleis los. Waaroor ek nié 'n keuse het nie, is of ek die woorde van Suid-Afrikaanse musiek wil hoor, al dan nie.
Glo my, ek het al probeer: Winkeleienaars verander nie die musiek na jou smaak nie. Jy moet maar klere in die bose kringloop van kakofonie koop.
Suid-Afrikaanse melodieë is altyd so eentonig. Dit gaan altyd oor die ou wat vir sy meisie, of sy bokkie, of baby (ek kan nie eens byhou met al die name nie) wil vertel hoe lief hy haar het , of hoe baie hy haar mis. Oor en oor gaan dit net aan en aan. Wat van mý ore? Hoekom moet ek my kop in 'n oorsese rigting draai vir gehalte-musiek?
Dáár skryf mense oor soveel meer. Katy Perry het tot 'n liedjie oor ET, die mannetjie met die rooi vinger in die lug, geskryf. ET! Suid-Afrikaanse sangers moet miskien nie "home phone" nie, maar oorsee "phone" vir wenke. En dan is dit die musiekvideo's. . . Ek luister en kyk nou al die laaste 10 jaar na opkomende Suid-Afrikaanse kunstenaars. Om 'n groepie meisies in eina-bikini's te kry wat in die agtergrond van jou video flou passies uitvoer, gaan nie jou loopbaan ophelder nie.
Doen méér as dit! Ek kyk skaars na die Afrikaanse musiekkanaal MK (net as daar Amerikaanse treffers op is).
Ja, oorsese musiek word op MK uitgesaai, maar Afrikaanse musiek word nooit op Amerikaanse kanale uitgesaai nie.
Dalk het ek te vinnig na 'n volgende kanaal oorgeskakel?
Ek weet nie.
Het jy al na 'n Lady Gaga-video gekyk en daarna na een van die "bokkie-treffers" geluister? Dis teleurstellend.
Ek luister veel eerder hoe Justin Bieber aanhou baby, as na een van my landsgenote wat dit doen.
Ek onthou dat daar 'n tydjie gelede berig is oor Juanita du Plessis wie se sangloopbaan 'n ongelooflike piek bereik het. Sy het die meeste albums in Suid-Afrika verkoop.
Die goeie nuus stop nie hier nie. Sy het dit reggekry om meer albums as sangers soos Lady Gaga, Beyonce en Rihanna te verkoop. . . in Suid-Afrika. Wat 'n eer! 'n Pluimpie vir Juanita! Sy het in haar eie land sangers wat duisende kilometer ver weg is, geklop. Is sy nie in elk geval veronderstel om meer te verkoop nie? Ek wonder hoe haar verkope in ander lande lyk. As daar 'n toeter op jóú waterskoeter is, is ek regtig bly vir jou.
Suid-Afrikaanse musiek moet wragtig sy seile span.
(Aldu Duminy is 'n JJ en is in gr.11 by Hoërskool Langenhoven in Riversdal.)