Skokkend!
Dit is die enigste manier om die wyse te beskryf waarop Atletiek Suid-Afrika (ASA) te werk gegaan het om die span te kies wat van 20 Julie in Kanada aan die junior-wêreldbyeenkoms deelneem.
Blykbaar het die keurders en Richard Stander, die administratiewe hoof van ASA, vergeet hulle werk met kinders.
Stander het gesê dat daar geen "passasiers" na die Wêreldbyeenkoms gestuur gaan word nie.
Daarom het hy van die atlete wat reeds op die Suid-Afrikaanse juniorbyeenkoms in April gekwalifiseer het, verwag om in Junie vir 'n tweede keer te kwalifiseer.
Byeenkomste swak beplan
Die probleem is dat die meeste van die Junie-byeenkomste chaoties was.
In baie nommers het daar net een of twee atlete deelgeneem. Vir 'n atleet om te kwalifiseer, moet daar minstens drie atlete deelneem.
Dit het beteken die organiseerders moes inderhaas planne maak. Atlete is links en regs opgekommandeer om sommer net saam weg te spring.
Van dié atlete het glo net enkele meters gehardloop voordat hulle gestop het, maar die organiseerders was tevrede omdat drie atlete deelgeneem het.
Op van die byeenkomste moes meisies teen seuns deelneem en soms is daar nie eers windlesing-metings geneem nie. Op een byeenkoms het 'n atleet sommer twee kanse gekry om te probeer kwalifiseer.
'n Atleet van Port Elizabeth het glo spesiaal na Stellenbosch gereis om daar te probeer kwalifiseer. Toe sy by die byeenkoms opdaag, moes sy uitvind die enigste atleet teen wie sy gaan deelneem, is 'n sewekamp-atleet wat 20
sekondes stadiger as sy hardloop.
Die Oos-Kaapse atleet het derhalwe nie gekwalifiseer nie.
Groot name weggelaat
Wat ouers en afrigters die meeste omkrap, is die dubbele standaarde wat gebruik is om die finale span te kies.
ASA se gebrek aan kommunikasie met die atlete is ook as 'n groot struikelblok uitgewys.
Atlete wat nie in Junie weer deelgeneem het soos wat ASA verwag het nie, of glad nie eens weer gekwalifiseer het nie, is vir die span gekies.
Dít terwyl twee Suid-Afrikaanse junior kampioene, Rynardt van Rensburg (800 m) en Shaun van Wyk (400 m-hekkies), wat wel deelgeneem het, weggelaat is.
Van Wyk en Van Rensburg se groot fout was dat hulle nie in hul betrokke nommers deelgeneem het nie. Van Rensburg het aan die 400 m en 1 500 m deelgeneem, terwyl Van Wyk aan die 200 m en 400 m deelgeneem het.
Toe Van Rensburg agterkom dat hy skynbaar 'n fout gemaak het, het hy ASA gekontak en gevra wat hom nou te doen staan. Daar is aan hom gesê dat hy 'n 600 m-tydtoets moes aflê en dat indien sy tyd vinnig genoeg is, hy vir die span oorweeg sou word.
Van Rensburg het die tydtoets in 1 minuut en 19 sekondes afgenael, wat beteken dat hy in staat is om 'n tyd van 1:48 minute in die 800 m te hardloop. Hy het dus eintlik al 'n tweede keer gekwalifiseer, maar is steeds nie gekies nie.
Van Wyk en Van Rensburg se afrigters het aangedui dat albei atlete so ontnugter met atletiek is dat hulle dit oorweeg om voortaan eerder maar rugby te speel.
G'n plek vir Rikenette
Rikenette Steenkamp, die Suid-Afrikaanse senior, junior en skole-hekkieskampioen, wat ook vroeër vanjaar in JIP verskyn het, is die ander skokkende weglating. Sy het gedurende die plaaslike seisoen ses keer vir die wêreldbyeenkoms gekwalifiseer.
Tog is sy volgens ASA nie goed genoeg om aan die wêreldbyeenkoms deel te neem nie.