JIP het gaan uitvind hoe tieners oor seks voel. Of hulle 'n skuldgevoel het as hulle seksueel aktief is, of hulle maar verkies om dít eerder vir later te los.
Marzahn Botha het gaan uitvind.
Seks - is ek reg?
Emma Stander van die Hoërskool Randburg skryf die volgende:
Om 'n tiener te wees was nog altyd moeilik, die mites en stories oor groepsdruk word ongelukkig 'n realiteit wanneer jy jou voete in die hoërskool sit (as dit nie al voor dit is nie).
My vriendinne kom uit opgevoede gesinne met sterk morele waardes.
Waar het alles skeefgeloop?
Vriendin A: Asemrowende mooi meisie verloor haar onskuld in 'n sekonde.
'n Vreemde seun word 'n lover ná 'n paar SMS'e en toe sy haar oë uitvee, verloor sy haar virginity in 'n aantrekkamer - hoe romanties. Sy was net 13 jaar oud.
Vriendin B: Ná 'n verhouding van 18 maande waar my vriendin (15) baie emosioneel misbruik gevoel het, het die druk te veel geword en verloor sy haar virginity. Die volgende week is ons by die hospitaal want die morning after pill het nie gewerk nie - gelukkig was sy nie swanger nie.
Vriendin C: Ná 'n week in 'n passievolle verhouding het sy (14) woeps-waps haar onskuld verloor.
Ná dit het sy verplig gevoel om by hom te bly.
Daar is girls (kennisse) wat nou 16 is en al met agt, nege of tien ouens geslaap het. Hulle is min gespin oor siektes en swangerskap. "Dis mos lekkerder sonder 'n kondoom."
Volgens Stander is nie alle tieners wel so "moreel korrup" soos die bostaande gevalle nie. "Met wie en wat jy jouself besig hou, bepaal wie en wat jy is," is haar opinie.
Wat sê die sielkundige?
Jolita Jansen van Rensburg, kliniese sielkundige van Potchefstroom, het die volgende vrae beantwoord:
Hoe vroeg is te vroeg seks?
Elke tiener het 'n ander mening daaroor. Dit hang af van jou kultuur, die wyse waarop jy grootgemaak is. Dit is egter belangrik dat elke tiener die saak met hom/haarself uitmaak en hul eie idees daaroor vorm.
Watter emosionele skade bring vroeë seks en losbandigheid mee?
Indien jy nog nie emosioneel reg is vir 'n seksuele verhouding nie, kan dit aanleiding gee tot sterk skuldgevoelens, hartseer, selfverwyt en moontlike latere seksuele probleme in verhoudinge.
Wanneer jy eers seksueel aktief was, is dit moeilik om terug te keer na 'n fase van geen seks.
Sommige tieners neem deel aan seksuele aktiwiteite omdat hulle nie kan "nee" sê nie, of omdat hulle nie uit wil voel nie. Vinnig word hulle vasgevang in 'n web waaruit hulle nie kan ontsnap nie en het dan seks vir al die verkeerde redes soos aanvaarding, aandag, liefde, net om elke keer teleurgesteld en verwerp te voel.
'n Losbandige tiener word ook vinnig geëtiketteer en as losbandig behandel wat hartseer en vernederend is en jou kan laat sleg voel oor jouself.
Hoe kan 'n meisie of ou standpunt inneem?
Deurdink jou houding en waardes ten opsigte van seksualiteit. Sal jy anders oor jouself en jou maat voel as julle seksueel aktief is? Indien wel, hoe? Moenie toelaat dat groepsdruk of alkohol jou besluit beïnvloed nie.
Julle het seks, wat is die voorsorgmaatreëls dan?
Toets albei eers vir MIV/vigs. Indien jou ouers daarvan bewus is dat jy seksueel aktief is, kan jy 'n afspraak maak by 'n ginekoloog wat verskillende voorsorgmaatreëls sal verduidelik. Jy kan ook by jou plaaslike kliniek voorbehoedmiddels bekom sonder ouerlike toestemming.
Lees wat sê ander tieners hier.