As jy die sepie 7de Laan slaafs navolg, weet jy daar was behoorlik bontgestaan in die storielyn vir die Hillside Times se kookboek-kompetisie.
Nou is daar vir aanhangers boonop die kookboek 7de Laan Kook in boekwinkels. Luidens 'n nuusverklaring sluit die resepte in Matrone se melktert, Charmaine se hoenderbrijani, Hilda se dadelvingers en sunrise surprise special en Paula se cocktails.
Kerneels Breytenbach is die skrywer van 7de Laan Kook en het boeke soos Die skoon grapboek, Die lekkerste lekker en Die ding tussen man en vrou op sy kerfstok. Daleen van der Merwe, Human & Rousseau se kookboekredakteur, het die resepte saamgestel.
Wat dink jy? Sal jy die boek koop vir jouself of vir jou ma?